စစ်ကိုင်းတိုင်းဒေသကြီး၊ မုံရွာမြို့တွင် ပိုးတွေ့လူနာ များပြားတဲ့အတွက် ပိုးတွေ့နေအိမ်တစ်ချို့ကို ဇန်နဝါရီလ ၂၄ ရက်နေ့ ညနေပိုင်းကစတင်ကာ အသွားအလာ ကန့်သတ်လိုက်တယ်လို့ မုံရွာမြို့နယ် အထွေထွေအုပ်ချုပ်ရေးဦးစီးဌာန တာဝန်ရှိသူက ပြောပါတယ်။ မုံရွာမြို့တွင် ယနေ့ ဇန်နဝါရီလ ၂၄ ရက်နေ့ တစ်ရက်ထဲမှာ ညနေပိုင်းအထိ ပိုးတွေ့လူနာအသစ် ၁၅ ဦး တွေ့ရှိခဲ့ပြီး ဘုရားကြီးရပ်ကွက်၊ နိဗ္ဗာန်လမ်းရှိ နေအိမ်တစ်အိမ်ထဲကတင် ပိုးတွေ့လူနာ ၃ ဦးအထိရှိခဲ့ပါတယ်။ ဒီအတွက် အဲဒီလမ်းက နေအိမ် ၆ လုံး၊ အိမ်ထောင်စု ၆ စု၊ လူဦးရေ ၁၇ ဦးကို ၁၁ ရက်ကြာ အသွားအလာကန့်သတ်လိုက်တာပါ။
“ဘုရားကြီးရပ်ကွက်က နိဗ္ဗာန်လမ်းကို Stay Home ချလိုက်တာပါ။ ၆ အိမ်ထောင်စုနဲ့ လူ ၁၇ ယောက် ရှိပါတယ်။ အဓိက ကတော့ ၁ အိမ်ထဲကို positive ၃ ယောက် ထွက်သွားတဲ့အတွက် Stay home ချလိုက်တာပါ။ ဆန်၊ ဆီ၊ ဟင်းသီးဟင်းရွက်တွေကိုလည်း ထောက်ပံ့ ပေးသွားမှာပါ။”လို့ မုံရွာမြို့နယ် အထွေထွေအုပ်ချုပ်ရေးဦးစီးဌာန၊ ဒုမြို့နယ်အုပ်ချုပ်ရေးမှူး ဦးအာကာမြင့် ကပြောပါတယ်။
ပြီးခဲ့တဲ့ ဒီဇင်ဘာလ ၂၁ ရက်နေ့က စတင်ကာ မုံရွာမြို့၊ မြဝတီရပ်ကွက်၊ သစ္စာလမ်း၊ လမ်းသွယ် ၄ က နေအိမ် ၈ အိမ်၊ လူ ၃၆ ဦးကို ပထမဆုံးအကြိမ် အသွားအလာကန့်သတ်ခဲ့ရာ လက်ရှိအချိန်ထိ ၆ နေရာ ရှိပြီဖြစ်ပါတယ်။
“မုံရွာမှာ ပထမဆုံးအကြိမ်အဖြစ် မြဝတီရပ်ကွက်ကို အသွားအလာကန့်သတ်ခဲ့တယ်။ ပြီးတော့ ထန်းတော အောင်ရတနာ၊ ဘုန်းစိုး၊ နတ်လူထိပ်ပန်ရပ်ကွက်တို့မှာ အသွားအလာ ကန့်သတ်ခဲ့ပါတယ်။ အခု ဘုရားကြီး၊ နိဗ္ဗာန်လမ်းမှာ အသွားအလာကန့်သတ်တာက အကြိမ် အရေအတွက် နဲ့ဆိုရင် ၆ ကြိမ် မြောက်ဖြစ်ပါတယ်။”လို့လည်း ဦးအာကာမြင့်က ထပ်ပြောပါတယ်။
ယနေ့ ၂၀၂၁ ခုနှစ် ဇန်နဝါရီလ ၂၄ ရက်နေ့ ညနေပိုင်း အထိ မုံရွာမြို့နယ်တွင် ကိုဗစ်လူနာအသစ်တွေ့ရှိမှု အနေနဲ့ ချမ်းမြဝတီရပ်ကွက်မှ ၂ ဦး၊ ဘုရားကြီးရပ်ကွက်မှ ၂ ဦး၊ ထန်းတောရပ်ကွက်မှ ၁ ဦး၊ ရန်ကင်းရပ်ကွက်မှ ၃ ဦး၊ ပြည်တော်သာရပ်ကွက်မှ ၁ ဦး၊ မြို့သစ်ရပ်ကွက်မှ ၁ ဦး၊ မြဝတီရပ်ကွက်မှ ၂ ဦး၊ ရတနာပုံရပ်ကွက် ၁ ဦး၊ စက်မှုဇုံ ၁ ဦး၊ နန္ဒဝန်ရပ်ကွက် ၁ ဦး စုစု ပေါင်း ၁၅ ဦးတွေ့ရှိထားပါတယ်။
စစ်ကိုင်းတိုင်းဒေသကြီးအစိုးရအဖွဲ့ရဲ့ ၂၀၂၁ ခုနှစ် ဇန်နဝါရီလ ၂၄ ရက်နေ့ ညနေ ၄ နာရီအချိန် ထုတ်ပြန်ချက်အရ မုံရွာမြို့နယ်မှာ ကိုဗစ်အတည်ပြုလူနာ ၂၀၁ ဦးရှိပြီး အဲဒီထဲမှ ဆေးရုံကနေ ဆင်းခွင့်ရသူ ၁၃၉ ဦးရှိကာ ကုသဆဲ ၅၉ ဦးနှင့် သေဆုံးသူ ၃ ဦးရှိတယ်လို့ သိရပါတယ်။
အေပီတီ
