စစ်ကိုင်းတိုင်းဒေသကြီး၊ မြင်းမူမြို့နယ်တွင် စက်တင်ဘာလ ၁၀ ရက်နေ့ ညပိုင်းက ကိုဗစ်အတည်ပြုလူနာတစ်ဦးတွေ့ရှိခဲ့တာပါ။ ကိုဗစ်လူနာနဲ့ ထိတွေ့ခဲ့သူ ၂၁ ဦးကိုလည်း စာရင်းကောက်ယူပြီး ကွာရင်တင်းစင်တာတွေမှာ ထားရှိကာ ပထမအကြိမ် Swab ရယူစစ်ဆေးရာမှာတော့ ကိုဗစ်ကပ်ရောဂါပိုး မတွေ့ရှိရဘူးလို့ မြင်းမူမြို့နယ် ပြည်သူ့လွှတ်တော်ကိုယ်စားလှယ် ဦးစိုးစံသက်ထွန်းက ပြောပါတယ်။
ကိုဗစ်လူနာရဲ့ မိသားစုဝင် ၆ ဦးအပါအဝင် ထိတွေ့ခဲ့သူ ၁၅ ဦး စုစုပေါင်း ၂၁ ဦးတို့ရဲ့ နှာခေါင်းတို့ဖတ်၊ အာခေါင်တို့ဖတ်တို့ကို ရယူပြီး စက်တင်ဘာ ၁၁ ရက်နေ့က မန္တလေးမြို့၊ ပြည်သူ့ကျန်းမာရေးဓာတ်ခွဲမှု ဆိုင်ရာဌာနကို ပို့ဆောင်စစ်ဆေးခဲ့ရာမှာ စက်တင်ဘာ ၁၂ ရက်နေ့ ညပိုင်းက Negative အဖြေ ထွက်ရှိကြောင်း သိရတာဖြစ်ပါတယ်။
“မိသားစုဝင် ၆ ယောက်နှင့် ထိတွေ့တဲ့သူ ၁၅ ယောက်ကို စစ်ဆေးခဲ့တာပါ။ အားလုံးက Negative ထွက်ပါတယ်။ သူတို့ကိုဆက်ပြီး Quaratine Center မှာ ထားမယ်။ သူတို့ရဲ့အခြေအနေ စောင့်ကြည့်မယ်။ ရွာရဲ့အခြေအနေကိုလည်း စောင့်ကြည့်မယ်။”လို့ ဦးစိုးစံသက်ထွန်းက ပြောပါတယ်။
ကိုဗစ်ပိုးတွေ့လူနာက ရန်ကုန်တိုင်းဒေသကြီး၊ မရမ်းကုန်းမြို့နယ်က KTV တစ်ခုမှာ အလုပ်လုပ်ပြီး ပြန်လာခဲ့သူဖြစ်ကာ အနံမရလို့ စက်တင်ဘာ ၉ ရက်နေ့က မြင်းမူမြို့ ပြည်သူ့ဆေးရုံကို လာရောက်ပြသခဲ့ပြီး စစ်ဆေးခဲ့ရာကနေ ရောဂါပိုးကူးစက်ခံထားရတာကို တွေ့ရှိခဲ့တာပါ။
“သူက မရမ်းကုန်းမြို့နယ်ကနေ ပြန်လာတာပါ။ KTV တစ်ခုမှာ အလုပ်လုပ်ပြီးပြန်လာတာပါ။ အဲတုန်းက မရမ်းကုန်းမြို့နယ်က Stay at Homeမဟုတ်တော့ Q မဝင်ရသေးဘူး။ ဒါပေမယ့် သူကအနံမရလို့ ဆေးရုံကိုလာပြလို့ သံသယလူနာထဲ ထည့်လိုက်တယ်။ သူတို့ Swab ယူစစ်ဆေးတဲ့အခါ ရောဂါပိုးတွေ့ရှိခဲ့တာပါ။”လို့လည်းပြောပါတယ်။
ကိုဗစ်အတည်ပြုလူနာက အသက် ၂၁ နှစ်အရွယ် အမျိုးသားဖြစ်ကာ မြင်းမူမြို့နယ် မဲနောကျေးရွာက ဖြစ်ပါတယ်။ လက်ရှိမှာတော့ လူနာကို မြင်းမူမြို့ ပြည်သူ့ဆေးရုံမှာထားရှိပြီး ကျန်းမာရေးအခြေအနေ ကောင်းမွန်တယ်လို့လည်း သိရပါတယ်။
သူရိယထက်
