ရေးသား – ဂနွဝင်ကိုကို
ကဲ…တော်လှန်သူရော မတော်လှန်သူ ပြည်သူအပေါင်းတို့ရေ
ကျွန်တော်တို့ရဲ့ ဉာဏ်ကြီးရှင် စစ်ခေါင်းဆောင်းဆိုသူတွေဆီကနေ ကမ္ဘာ့အဆင့်မီ ဆင်ခြေတစ်ခုနဲ့ နောက်ထပ် မဟာဗျူဟာမြောက် စီမံကိန်းကြီးတစ်ခု ထွက်လာပြန်ပါပြီ။ အရှေ့အလယ်ပိုင်းမှာ စစ်ဖြစ်နေလို့ စက်သုံးဆီဝယ်ဖို့ ခက်သွားတယ်တဲ့ဗျာ။ ဒါကြောင့် ကားတွေကို “စုံ” ဂဏန်းပတ်၊ “မ” ဂဏန်းပတ် ခွဲပြီး တစ်ရက်ခြားစီပဲ မောင်းခွင့်ပြုတော့မယ်လို့ ဆိုပါတယ်။
စဉ်းစားသာကြည့်ကြပါတော့… အရှေ့အလယ်ပိုင်းမှာ ဗုံးကွဲတာနဲ့ ကျွန်တော်တို့ဆီက ဆီဆိုင်တွေမှာ ဆီကုန်သွားရောတဲ့။ အိမ်နီးချင်း ထိုင်းတို့၊ အိန္ဒိယတို့မှာကျတော့ ဘယ်သူမှ ဆီဆိုင်ရှေ့မှာ ခြင်ထောင်ထောင်ပြီး အိပ်မနေရပါဘူး။ တကယ့် ပြဿနာက ကမ္ဘာ့ဆီဈေးကြောင့် မဟုတ်ဘဲ နိုင်ငံတကာက အပေါင်းအသင်းမလုပ်တော့လို့၊ ရင်းနှီးမြှုပ်နှံသူတွေ ပြေးကုန်လို့ ကိုယ့်အိတ်ကပ်ထဲမှာ ဒေါ်လာ (USD) ပြတ်နေတာပါ။ “ပိုက်ဆံမရှိလို့ ဆီမဝယ်နိုင်ပါဘူး” လို့ ရိုးရိုးသားသား ဝန်မခံချင်ဘဲ အရှေ့အလယ်ပိုင်းက ဒုံးကျည်တွေကို လှမ်းပြီး ဗန်းပြနေတာ တွေးကြည့်လေ ရယ်စရာကောင်းလေပါပဲ။
ဒီလို “စုံ/မ” ကစားလိုက်တော့ ဘာဖြစ်မလဲ။ လွယ်လွယ်လေးပါ။ ရုံးသွားမယ့်သူတွေ၊ ကုန်ပို့မယ့်သူတွေက တနင်္လာ၊ ဗုဒ္ဓဟူး၊ သောကြာပဲ အလုပ်လုပ်၊ ကျန်တဲ့ရက်တွေဆို သူဌေးကို “ဒီနေ့ ကျွန်တော့်ကားနံပါတ်က ဥပုသ်စောင့်ရမယ့်ရက်မို့ အလုပ်မလာတော့ဘူး” လို့ ဖုန်းဆက်ခွင့်ရသွားတာပေါ့။ စီးပွားရေးလည်ပတ်မှု ထက်ဝက်တိတိ ရပ်သွားမယ်။ သယ်ယူပို့ဆောင်ရေးစရိတ်တွေ တက်လာတော့ အခြေခံစားသောက်ကုန်ဈေးတွေကလည်း ဒုံးပျံစီးပြီး တက်သွားဖို့ပဲ ရှိပါတယ်။
“ကားမမောင်းရတဲ့ရက် YBS စီးပေါ့” လို့ ဉာဏ်လေး တစ်မိုက်လောက်နဲ့ အကြံပေးချင်တဲ့ လူတွေကိုလည်း YBS ပေါ် တစ်ခေါက်လောက် တက်ကြည့်ခိုင်းချင်ပါတယ်။ အခုတောင် ငါးပိသိပ် ငါးချဉ်သိပ် လိုက်နေရတဲ့ ဘတ်စ်ကားတွေပေါ်ကို ကားမောင်းခွင့်မရတဲ့ ပြည်သူတစ်ဝက်လောက် ထပ်တိုးစီးကြည့်လိုက်ပါ။ လူဝင်သွားပြီး ထွက်လာရင် ငါးခြောက်ပြားလေး ဖြစ်လာမယ့် အကွက်ပါ။ အစားထိုးစရာ အများပြည်သူပို့ဆောင်ရေးစနစ် ကောင်းကောင်းမရှိဘဲနဲ့ အခုလို ပိတ်ပင်တာဟာ “ရေမလာရင် ရေချိုးမနေနဲ့ပေါ့” လို့ ပြောတဲ့ တာဝန်မဲ့မှုပါပဲ။
ဒါပေမဲ့ ဒီအစီအစဉ်ကို သဘောကျမယ့် လူတန်းစားတစ်ရပ်တော့ ရှိပါတယ်။ အဲဒါကတော့ လမ်းပေါ်က စစ်ဆေးရေးဂိတ်တွေနဲ့ အောက်ခြေ အာဏာပိုင်တွေပါပဲ။ လိုင်စင်ပြား အတုတွေ ပေါ်လာမယ်။ မောင်းခွင့်မရှိတဲ့ရက် မောင်းချင်ရင် ဂိတ်မှာ “လက်ဖက်ရည်ဖိုး” လေး ပေးလိုက်တာနဲ့ “စုံ/မ” တွေကိစ္စ မရှိတော့ပါဘူး။ ပြောရရင်တော့ ဒီစနစ်ဟာ အကျင့်ပျက်ခြစားမှုအတွက် စီးပွားရေး လှုံ့ဆော်မှု အသစ်တစ်ခု ဖန်တီးပေးလိုက်တာပါပဲ။
ဒီ “စုံ/မ” စာထွက်လာတာဟာ ကိုယ့်အမှားကို သူတစ်ပါးအပေါ် ပုံချချင်တဲ့၊ ပြဿနာရဲ့ အရင်းအမြစ်ကို မကုဘဲ အဖျားကိုသာ ဖာထေးချင်တဲ့ စီမံခန့်ခွဲမှု အလွဲကြီးတစ်ခုပါ။
ဒီလို ဉာဏ်နည်းလွန်းတဲ့၊ အမြဲတမ်း ပြည်သူကိုပဲ ဒုက္ခရှာပေးနေတဲ့ သူတွေရဲ့ ကစားကွင်းထဲမှာ ကျွန်တော်တို့ ဘယ်လောက်ကြာကြာ ဆက်ကစားနေကြမလဲ။ သူတို့ရဲ့ ယန္တရားတွေ အလုပ်မဖြစ်အောင်၊ ဒီလို အဓိပ္ပာယ်မဲ့တဲ့ ညွှန်ကြားချက်တွေကို လူရွှင်တော်တွေရဲ့ ပြက်လုံးတစ်ခုလို သဘောထားပြီး ကျွန်တော်တို့အားလုံး အသိဉာဏ်နဲ့ ယှဉ်ကာ ဆက်လက် အာဏာဖီဆန်ကြဖို့ အချိန်တန်နေတုန်းဆိုတာ သတိပေးလိုက်ပါရစေ။
#Lootmyaukyar
မှတ်ချက်။ ။ လွတ်မြောက်ရာမှ ကူးယူဖော်ပြပါသည်။
