အညာဒေသ စစ်ကိုင်းတိုင်းထဲမှာ တပိုင်တနိုင် ဝက်မွေးမြူရေး လုပ်ကိုင်နေကြတဲ့ ဒေသခံတွေဟာ ဝက်စာစျေးနှုန်းတွေ မြင့်တက်သွားတာကြောင့် အရှုံးပေါ်နေတယ်လို့ ဝက်မွေးမြူရေးလုပ်ကိုင်သူတွေက ပြောပါတယ်။
၂၀၂၅ ခုနှစ်အကုန်နဲ့ ၂၀၂၆ ခုနှစ်အစပိုင်းမှာ ဝက်စာစျေးနှုန်းတွေ မမြင့်တက်ခဲ့သော်လည်း ပြီးခဲ့တဲ့ ဖေဖော်ဝါရီလကစလို့ ဝက်စာစျေးနှုန်းတွေ ထိုးတက်သွားတာလို့ဆိုပါတယ်။
“အရင်က ဝက်စာဖွဲအိတ်တစ်လုံးဆိုရင် ကျပ်ငွေ သုံးသောင်းကျော်လောက်ပဲရှိတာ ။ အခုဆိုရင် ဖွဲအိတ်တစ်လုံးဆိုရင် ကျပ်ငွေ လေးသောင်းခွဲရှိတယ်။ အရင်က ဝက်ကလေးစာဆိုရင် ကျပ်ငွေ သုံးသောင်းလောက်ပဲရှိတာ။ ဝက်ကလေးစာတွေကလည်း အခုဆိုရင် ကျပ်ငွေတစ်သိန်းကျော်ပေါက်တယ် ” လို့ ဝက်မွေးမြူရေး လုပ်ကိုင်သူတွေက ပြောပါတယ်။
ဒါ့အပြင် နို့ဖြတ်တလခွဲရှိတဲ့ ဝက်ကလေးစျေးနှုန်းတွေဟာ ၂၀၂၅ ခုနှစ်အကုန်နဲ့ ၂၀၂၆ ခုနှစ်အစပိုင်းမှာ တကောင်ကို ကျပ်ငွေ သုံးသိန်းအထိ စျေးကောင်းရခဲ့သော်လည်း ယခုအခါမှာ နို့ဖြတ်တလခွဲရှိတဲ့ ဝက်ကလေးတကောင်ကို ကျပ်ငွေ နှစ်သိန်းနီးပါးလောက်သာရှိတော့တယ်လို့ သိရပါတယ်။
“တလခွဲဝက်ကလေးဝယ်ကြတဲ့သူတွေကလည်း ဝယ်ရင် စျေးနှိမ်ဝယ်တယ်။ သူတို့က တဖက်ဖောက်သည်ကို ပြန်ရောင်းတော့ စျေးတင်ရောင်းကြတာ ။ ဗမာဝက်တွေလည်း စျေးမကောင်းဘူး ။ ထိုင်းဝက်တွေလည်း စျေးမကောင်းဘူး ။ ဝက်သားစျေးကြတော့ တက်တယ်။ ဝက်သားတပိဿာကို ကျပ်ငွေ နှစ်သောင်းခွဲကနေ သုံးသောင်းအထိ စျေးပေါက်တယ် ” လို့ ယင်းမာပင်မြို့နယ်က ဝက်မွေးမြူရေးလုပ်ကိုင်သူတစ်ဦးက ပြောပါတယ်။
စစ်ကိုင်းတိုင်းထဲက ယင်းမာပင် ၊ ကနီ ၊ ဆားလင်းကြီး ၊ ပုလဲ ၊ ကျွန်းလှ ၊ ကောလင်း ၊ ရွှေဘို ၊ ရေဦး ၊ ခင်ဦး စတဲ့မြို့နယ်တွေမှာ နေထိုင်ကြတဲ့ ဒေသခံအချို့ဟာ တပိုင်တနိုင် ဝက်မွေးမြူရေးလုပ်ငန်း လုပ်ကိုင်နေကြတယ်လို့ သိရပါတယ်။
