စစ်ကိုင်းတိုင်း၊ ပုလဲမြို့နယ်မှာ BNRA နဲ့ NUG တပ်ဖွဲ့ဝင်တွေ ထိတွေ့တိုက်ပွဲဖြစ်ပွားတဲ့နေရာကို စစ်ကော်မရှင်တပ်က လေကြောင်းတိုက်ခိုက်သွားတယ်လို့ ဒေသခံကပြောပါတယ်။
ဒီကနေ့ ဖေဖော်ဝါရီ ၁၇ ရက် နံနက်ပိုင်းအချိန်မှာ ဗမာအမျိုးသားတော်လှန်ရေးတပ်မတော် – Burma National Revolutionary Army (BNRA) လက်အောက်ခံတပ်ဖွဲ့ဝင်တွေနဲ့ အမျိုးသားညီညွတ်ရေးအစိုးရ(NUG)ရဲ့တပ်ရင်းတပ်ဖွဲ့ဝင်တွေကြား ထိတွေ့တိုက်ပွဲဖြစ်ပွားခဲ့တာလို့ ဒေသခံကပြောပါတယ်။
“မနက်က အစောကြီးပဲ ပစ်ခတ်တဲ့အသံတွေကြားရတယ်။ ၈ နာရီလောက်ကြတော့ နဂါးအဖွဲ့နဲ့ NUG အောက်ခံတပ်အချို့ ထိတွေ့မှုဖြစ်တယ်လို့ကြားရတာ။ ထိတွေ့မှုက တင်းမာနေတုန်း စစ်ကော်မရှင်တပ်က လေကြောင်းနဲ့ လာကြဲသွားတာ။ နှစ်ဖက်ထိခိုက်တာတွေရှိတယ်လို့တော့ကြားရတယ်” လို့ ပုလဲမြို့နယ်ဒေသခံတဦးက ပြောပါတယ်။
ဖေဖော်ဝါရီလ ၁၂ ရက်နေ့ကလည်း ပုလဲမြို့နယ်တနေရာမှာ ယင်းမာပင်ခရိုင် တပ်ရင်း(၄)မှာ တာဝန်ထမ်းဆောင်နေတဲ့ ရဲဘော်ကိုကတုံးနဲ့ BNRA တပ်ဖွဲ့ဝင်တို့အကြား ထိတွေ့မှုဖြစ်ပွားခဲ့ကြပြီးနောက် ရဲဘော်ကိုကတုံးဆိုသူ သေဆုံးတဲ့ဖြစ်ရပ် ဖြစ်ပွားခဲ့သေးတယ်လို့ ဒေသခံကပြောပါတယ်။
အမျိုးသားညီညွတ်ရေးအစိုးရ NUGက BNRA တပ်ဖွဲ့ဝင်အချို့ကို တရားဥပဒေလမ်းကြောင်းအရ အရေးယူဆောင်ရွက်သွားဖို့ တောင်းဆိုရာကနေ နှစ်ဖက်တင်းမားပြီးနောက် အခုလို ထိတွေ့မှုဖြစ်ပွားခဲ့တာလို့လည်း ဒေသခံကပြောပါတယ်။
