စစ်ကိုင်းတိုင်း၊ ကနီမြို့နယ် ဆူးလေးကုန်းရွာကို စစ်ကော်မရှင်တပ်က JF ဖိုက်တာနဲ့ မတ်လ ၂၁ ရက်နေ့ နေ့လည်ပိုင်းမှာ လေကြောင်းတိုက်ခိုက်ခဲ့တယ်လို့ ဒေသခံတွေက ပြောပါတယ်။
စစ်ကော်မရှင်တပ်ရဲ့ လေကြောင်းတိုက်ခိုက်မှုကြောင့် အရပ်သားထိခိုက်၊ သေဆုံးသူမှု အများအပြားရှိခဲ့တယ်လို့ ဆိုပါတယ်။
“ဗုံးကြဲလေယာဉ်အစုံနဲ့ လာကြဲသွားတာ ။ ထိခိုက်သေဆုံးမှုက များတယ်။ အရေအတွက်မသိရသေးဘူး။ အဆောက်အဉီးတွေ မီးလောင်ပျက်စီးတာလည်းရှိတယ်”လို့ ကနီမြို့နယ်ဒေသခံတစ်ဦးက ပြောပါတယ်။
ကနီနယ် တနေရာသို့ တံတားဦးတက် ဂျက်ဖိုက်တာ ၄ စီး ၊ မိတ္ထီလာရှမ်းတဲတက် ဂျက်ဖိုက်တာ ၂ စီး ၊ မကွေးလေတပ် (ကလခ) တက် ဂျက်ဖိုက်တာ၂စီး စုစုပေါင်း ၈ စီးအသုံးပြုပြီး လေကြောင်းတိုက်ခိုက်မှု ၁၅ ကြိမ်ထက်မနည်း တိုက်ခိုက်တာခံခဲ့ရတယ်လို့ဆိုပါတယ်။
စစ်ကော်မရှင်တပ်ဟာ အခုရက်ပိုင်း စစ်ကိုင်းတိုင်းထဲက မြို့နယ်အချို့ကို လေကြောင်းတိုက်ခိုက်မှုတွေ အဆက်မပြတ်လုပ်ဆောင်နေတာကြောင့်အရပ်သား ထိခိုက်သေဆုံးမှုတွေ မြင့်တက်လာနေတာပါ။
ဒါ့အပြင် စစ်ကိုင်းတိုင်းထဲက မြို့နယ်အချို့ကို စစ်ကော်မရှင်တပ်က မြေပြင်ထိုးစစ်တွေ လုပ်ဆောင်နေကြတယ်လို့ သိရပါတယ်။
Photo – လေကြောင်းတိုက်ခိုက်ခံခဲ့ရပြီး ဆူးလေကုန်းရွာမြင်ကွင်း။
