“ကမ္ဘာကြည့် ကြည့်ဖို့လိုတယ်”

သီချင်းခံစားမှု

“ကမ္ဘာကြည့် ကြည့်ဖို့လိုတယ်”

ဝာပလု ရေးတယ်။

အကြောင်းအရာတခုကို သုံးသပ်တဲ့အကြောင်း ရေးတော့မယ်ဆိုတော့ ဖျတ်ကနဲ တွေးလိုက်မိတာက သတိထားရမယ် ဆိုတဲ့အတွေးပါ။

ကိုယ်ထင်ရာ ကိုယ်ပြောတာပဲ ကျိုးကြောင်းဆီလျှော်တယ်ဆို ရပြီမဟုတ်လားဆိုတဲ့ အတွေးကလဲ ဒွန်တွဲပါလာတယ်။

ဘာမှမပြောခဲ့ မရေးခဲ့တာနဲ့စာရင် နည်းနည်း ပြောခဲ့ရေးခဲ့တာက ပိုမကောင်းဘူးလား ဆိုတာလဲ ရှိပြန်တယ်။ ဒီတော့ လတ်တလော စာရေးဖို့ ရလာ‌တဲ့ ခေါင်းစဉ်က “ကမ္ဘာကြည့် ကြည့်ဖို့လိုတယ်” ဆိုတဲ့ ခေါင်းစဉ်ပါ။

လတ်တလော အဆိုတော်တယောက်ရဲ့ သီချင်းတပုဒ်နဲ့ ပတ်သက်ပြီး ဝေဖန်ထားတာလေးတွေ တွေ့လာရတယ်။

ဒီနေရာမှာ အဆိုတော်လို့ပဲ သုံးချင်ပါတယ်။ဘာလို့လဲဆိုတော့ ကျနော်က ဘယ်နိုင်ငံက ဘယ်အဆိုတော်ပဲဖြစ်ဖြစ် နားနဲ့တည့်ရင် အကုန်နားထောင်တယ်။ခံစားတယ်။စီးမျောတယ်။အနုပညာပြကွက်တခုစာမျှရယ်လို့ပဲ တွေးတယ်။မြင်တယ်။

မလေးရှားအဆိုတော်လဲ ကြိုက်လိုက်တာပဲ။ ဂျပန်အဆိုတော်လဲ နားထောင်တာပဲ။ ထိုင်းအဆိုတော်လဲ ခံစားလိုက်တာပဲ။ ရှမ်းအဆိုတော်လဲ စီးမျောလိုက်တာပဲ။ ကိုယ့်စိတ်နဲ့တည့်တဲ့ ဆိုပုံဆိုပေါက်၊ဖောက်ထွက်ထားတာ ၊ပုံစံမတူတာတွေဆို အချိန်ပေးပြီးတော့ကို နားဆင်ခံစားတာပါ။

ဒီတော့ ပြောချင်တာက ဘာလူမျိုး၊ဘာနိုင်ငံသားဖြစ်ဖြစ် ဘယ်ဘာသာစကားနဲ့ပဲဆိုဆို ကိုယ်ကကြိုက်လို့ နားဆင်ခံစားတဲ့သီချင်းကို သီဆိုသူတိုင်းကို အဆိုတော်လို့ပဲ သတ်မှတ်တယ်။မှတ်ယူတယ်။

ဒီနေရာမှာ တခုပြောစရာရှိတယ်။ကျနော့်ပင်ကိုယ်စိတ်အခံက သီချင်းဆိုသူရဲ့ အသံတွေ အပြုအမူတွေကို လိုက်ကြည့်ပြီး ဒီအကြောင်းအရာကိုရေးတဲ့ တေးရေးသူ၊တေးတပုဒ်ဖန်တီးသူကို ပြေးပြေးမြင်ပြီး အနုပညာတခုကို စားသုံးလေ့ရှိပါတယ်။

ကိုယ်တိုင်ရေး ကိုယ်တိုင်ခံစားသီဆိုသူဆိုရင်တော့ အဲဒိလူရဲ့ အနုပညာအစွမ်းကို ပိုခိုက်တယ်။ဖန်တီးသူနဲ့ ခံစားသူကြားမှာ အဆင့်တွေ ကျော်ခဲ့ရမှာပါ။

ဒီနေရာမှာ ဒီအဆင့်တွေကို အကျယ်တဝင့် မပြောချင်ဘူး။အဓိကပြောချင်တာက ခံစားမှုတခုကို အစွဲကင်းကင်းနဲ့ လွတ်လွတ်လပ်လပ် စီးမျောခံစားရတာကို ပိုကြိုက်ပါတယ်။

သိုင်းဝိုင်းပြောနေရတာကိုက လေကြောရှည်အောင် ဆွဲဆန့်ထားရသလိုတော့ ဖြစ်တယ်။ လိုရင်းသွားမယ်ဗျာ။အခုတလော TikTok စာမျက်နှာမှာရော YouTube စာမျက်နှာမှာပါ လူပြောများနေတဲ့ သီချင်းတပုဒ်ရှိပါတယ်။သီချင်း‌ ခေါင်းစဉ်က “ကရင်မအချစ် နံပါတ်တစ်”။

ဒီသီချင်းကို စပြီး‌နားထောင်တဲ့ ပထမအခေါက်မှာတည်းက အတွေးတခုရတယ်။ဒါမျိုးလဲ လုပ်လို့ရတာပဲ ဆိုတာပါ။

သီချင်းကို ကရင်လိုတပိုင်း မြန်မာလိုတပိုင်း သီဆိုထားတာဖြစ်တယ်။သံစဉ်နဲ့ စာသားက ချက်ချင်းဆိုသလို လူတယောက်ရဲ့ရင်ဘတ်ထဲ တန်းရောက်သွားစေနိုင်တဲ့ ဖန်တီးမှုမျိုး ဖြစ်ပါတယ်။

ဒီနေရာမှာ ကရင်လိုနဲ့ မြန်မာလိုလို့သုံးပြီး ကျနော်ရေးရတဲ့အရာတခု ရှိပါတယ်။ ဘာသာစကားတခုကို ဘာသာစကားလို့ အမြင်ထားတယ်။

အင်္ဂလိပ်ဘာသာစကားနဲ့ ကရင်ဘာသာစကား တွဲဆိုလို့ မရဘူးလား။ ဂျပန်ဘာသာစကားနဲ့ ကရင်ဘာသာစကား တွဲဆိုရင်ရော ဘာဖြစ်သွားနိုင်သလဲ။အရောအနှောဆိုကြ ရေးကြတဲ့သူတွေလဲ တပုံကြီးရှိပါတယ်။ဘာသာစကားလို့ပြောရင် ဘယ်ဘာသာစကားကိုမဆို တယောက်ယောက်က ကြိုက်လို့ အသုံးတည့်လို့ ယူသုံးရင် မရဘူးလားဆိုတဲ့ အရာတွေက ဆင့်ပွားဆင့်ပွား တွေးစရာတွေ ဖြစ်လာပါတယ်။

အကြောင်းကတော့ ဒီ “ကရင်မအချစ် နံပါတ်တစ်” ဆိုတဲ့ သီချင်းဖန်တီးသူတွေကို ဝေဖန်တာတွေ ၊ရှုတ်ချတာတွေ၊ကဲ့ရဲ့တာတွေ ပြုလုပ်လာကြတာကို တွေ့ရပါတယ်။

သီချင်းတပုဒ်လုံးကို ကရင်လိုပဲ မဆိုရမလား ဆိုတဲ့သူတွေလဲ ရှိရဲ့။ ဖျက်လိုဖျက်ဆီး လုပ်တယ်လို့ ပြောတဲ့သူတွေကလဲ ရှိရဲ့။ အသံထွက်မပီသလို့ ဆိုသူ‌ေတွလဲပါရဲ့။ ပုံရိပ်တခုခုကို ထိခိုက်ပါတယ်လို့ ရေးသားပြောဆိုတဲ့သူ‌တွေကိုလဲ တွေ့ရပါတယ်။

ဒါဟာ လမ်းသစ်ဖောက်သူရဲ့ ပထမဆုံး စကြုံရတဲ့ ဖြစ်စဉ်တခုပါ။အရှေ့မှာလဲ ဒါမျိုးပုံစံတူ ဖြစ်စဉ်တွေ ရှိခဲ့တယ်။အနီးစပ်ဆုံးပြောရရင် ဘောလိဝု ရုပ်ရှင်လောကမှာ နံမည်ကြီးတဲ့ PK ရုပ်ရှင်သည်လည်း ထွက်ထွက်ချင်းမှာ ဝေဆာမြိုင်အောင် အသံတွေထွက်‌ဝေဖန်ခံခဲ့ရတာမျိုး ရှိခဲ့တယ်။ မလေးရှားအဆိုတော် Namewee ရဲ့ O My Godသီချင်းဟာလည်း ဝေဖန်ခံခဲ့ရတာပါပဲ။

လမ်းရိုးလမ်းဟောင်းကနေ တယောက်ယောက်က ခွဲထွက်သွားရင် ဝိုင်းပြောမယ်ဆိုတာ ကျနော်တို့ မိသားစုဝင်တွေပါပဲ။ ပြောရရင်တော့ ကိုယ်ပေါင်ကိုယ်လှန်ထောင်းရသလိုပါ။

ကမ္ဘာကြည့် ကြည့်ခြင်းဆိုတဲ့ အသုံးတခုကို သွားသတိရတယ်။ ကိုယ့်အဝန်းအဝိုင်းပဲ ကြည့်မနေနဲ့ ။တခြားတခြား‌သော အဝန်းအဝိုင်းမှာ ဘာတွေလုပ်နေလဲဆိုတာကိုလဲ နားစွင့်ကြရတယ်။

မြင်အောင်လဲ ကြည့်ရတယ်။ပြီးတော့မှ ကိုယ့်အလှည့်ကျရင် ဘယ်လိုလှအောင်လုပ်မလဲဆိုတာ နောက်တဆင့် တက်လှမ်းကြရတာ ဖြစ်ပါတယ်။

ကဗျာဆရာတယောက် ပြောဖူးတဲ့စကားတခွန်းရှိတယ်။ “ခင်ဗျားတို့ အနုပညာအလုပ် လုပ်တယ်ဆိုတာ ကမ္ဘာကြည့် ကြည့်တတ်ဖို့ လိုတယ်။တခါလာလဲ စိန်ခြူးကြာညောင် တခါလာလဲ စိန်ခြူးကြာညောင် စိန်ခြူးကြာညောင်အဆင့်က မတက်ကြဘူးဆိုရင် သူများနောက် ကျန်ခဲ့မှာပဲ။ကမ္ဘာမှာ ကျည်ဆန်ရထားတွေ သွားနေပြီ။အမှီလိုက်ဖို့တော့ လိုတယ်”တဲ့။

စာရေးသူကျနော့်အတွက်တော့ နားထောင်ဖူးသမျှ သီချင်းတွေထဲ ဒီ”ကရင်မအချစ် နံပါတ်တစ်” သီချင်းဟာ သီချင်းပုံစံ အသစ်တခုတော့ မဟုတ်ပါဘူး။

တခုခုကို ဖောက်ထွက်ထားတယ်။ပြောင်းပြန်လှန်ထားတယ်။အနုပညာရဲ့ ကျယ်ပြောချင်းကို ရဲရဲဝံ့ဝံ့ လုပ်ရဲသူတယောက်လို့ မြင်ပါတယ်။

အနုပညာဆိုတာ အင်မတန် ကျယ်ဝန်းပါတယ်။စာနဲ့ရေးပြလို့ ကွက်ကွက်ကွင်းကွင်း မမြင်သာမှာစိုးတဲ့အတွက် မရေးတော့ပါဘူး။တယောက်ယောက်က လျှောက်လို့ လမ်းပေါက်သွားရင်လဲ နောက်လူက အဲဒိလမ်းကို လျှောက်ကြဦးမှာပါပဲ။လမ်းစဖောက်သူကတော့ အပင်ပမ်းခံရစမြဲပါ။

ကျနော်နားထောင်ဖြစ်တဲ့ အဆိုတော်တွေထဲက Saw Kway ၊ Syar Rock ၊ Namewee ၊ Ku Ka Rap၊ Sa Plan Kine ၊ Owl City ၊ Passenger ၊ Snoop Dogg ၊ Wiz Khalifa တို့ပါ။

လတ်တလော စိတ်ထဲပေါ်လာသလောက်ပါပဲ။တခြားတခြားသော အဆိုတော်တွေရဲ့ သီချင်းတွေလဲ နားထောင်ဖြစ်ပါတယ်။ နားထောင်ကြည့်ပါ။ ကမ္ဘာကြည့် ကြည့်ပါ။ ဘယ်သူကတော့ ဘယ်လိုလေး လုပ်ထားတာပါလို့ ရေးရေးလေး တွေးမိလာပါလိမ့်မယ်။

#တာပလု